Begena Korang kaka ade di nagi pung kabar. Bebae jo ka? Te rasa e, taon 2009 so habis su berlalu tingga kenangan. Di malam taon baru Kolong Pohong sembayang permesa mati pu unto korang semua. Abi Kolong Pohong tako korang di taon baru ini bua tesalah. Tega te lama legi torang mesti mulai bepile orang mode macam belanja di pasar oka tu ka. Tahu to ada mol di pasa oka tu. Kalo buka karung baru orang semua waibalun ampe weri datang bekumpo di situ.
Dorang semua yang datang pi korang di taon baru ni, jangan lupa ile bebae se. liat dorang pung model beto ka ne, buso ka buro dorang tu. Dorang tu mode barang di pasa oka tu ka. Barang bekas, RB te ka dia pung nama. Hati-hati se, jangan sampe te salah mata piki barang baru padahal so RB le. Ancor ka tu.
Gena kabar di nagi ni? Kolong Pohong rindu bale nagi, mau liat dorang semua pung batang indong so muncul ka belom. Su mulai tebar pesena ka belom. Dorang apa jo e selama ini. Pasti tu dorang mulai ambe hati kaka ade, itu te ka tebar pesona mode yang penah Kolong Pohong kewesa waktu itu.
Te lama legi kalo so bale nagi, Kolong Pohong mesti keliling nagi bila perlu lao datang, lua datang dalam datang pokonya yang datang-datang dorang tu mesti Kolong Pohong sampe. Cek gena kaka ade dorang pung persiapan mau pile Bupati me wakil baru legi. Tega No Besa pu masa jabatan su mau abis po. So lima taon po jadi mesti turo ka dari singgasana, kalo orang jawa bilang lengser ke prabon dang ka.
Kolong Pohong so pegang dorang semua balon-balon pung nama. Bukan Cuma nama, dorang pung daftar bae atau buso buro po so lengkap le. Tinggal tunggu tanggal main jo Kolong Pohong mulai buka hatu perhatu biar korang semua tahu orang mode apa yang mau pimpin Flotim te.
Pasti le selama ini korang mulai lia, baca di Koran, ada yang mulai cari pasang, maso minta kiri kanan. Ada jo su dapat pasangan. Yang so ada gigi tu ada beberapa, dorang mulai puko dada bilang paling besa, paling hebat, semua partai dorang so gengga dalam tanga. Beto ka ne. Jangan sampe itu Cuma tentura kuko te tajam. Bunyi kiri kanan me kenyataannya, so tahu tu le. Nol ka, ampa lalu.
Terada guna mulo banyak kalo bukti te ada. Apalegi dorang yang nama so merah tu, jangan harap legi ka orang pile dorang. So bau tu le, pake minya wangi po terada guna legi. Idong te bisa angka kalo deka dorang. Lebe bae pamit jo, bilang so te mampu besaing dengan yang mesi bae. Semoga jo e ada yang bae di taon baru ini. Kolong Polong harap pas sampe nagi terima kabar bae bukannya kabar buro.
Sebelum lupa, selamat taon baru 2010 dulu unto semua kaka ade di Nagi tanah. Jangan sampe lupa sembayang banyak, pas prosesi nanti permesa bebae supaya nagi jadi lebe bae lima taon legi. Tega korang so lia to jadi apa nagi lima tahun lalu ni? (****)
Tidak ada komentar:
Posting Komentar