Minggu, 18 September 2011

Kolong Pohong 248 Sapa yang kerawadana? (Disadur dari Mingguan Berita Buser Timur)

Kerawadana beto dorang di nagi sekarang ini. Tega apa maka semua te jadi begini. Sapa yang salah, so tetau legi. Mau bua salah sapa terada guna. Dorang semua kerawa po. So te bae, jangan sampe ada pesan sponsor ni? Kolong Pohong po tetau.
Kolong Pohong te dudo telepo me kaka ade di muka rumah. Torang bekewesa tentang pemilu kada di Flotim yang sampe sekarang te tau so sampe ena. Torang beomong sementara maka jagong rebo, itu te ka omong tentang dorang pung kerawa buso na buso. Torang bingung tega apa Pemilukada di Lembata so maju jalan jao kase tingga torang di Nagi. Semua proses di lembata mulus, lancar terada halangan. Te sama me di Nagi. Orang Flotim hobi terempo di batu besar bukan di kelike. So tahu to kalo batu besa bearti parah le…
Info se… waktu torang bekewesa te omong juga tentang islah ka apa dia ka. Heran le apa hubungan islah dengan pemilukada? Kolong Pohong ni bodoh maca kebeku jadi te mengerti. Ada ka ne aturan yang ato tentang islah. Kalo terada jangan sampe itu Cuma bua unto hatu dua orang jo.
Kolong Pohong curiga jangan sampe ada orang yang mau ahlikan isu dari Pemilukada yang harusnya so mulai jalan legi. Kalau begitu so te beto. Padahal ada Undang-Undang yang ato tentang semua masalah di nagi ni. Memang KPUD Flotim yang lama ada bua tesalah jadi ganti me baru. Kalo so gitu lebe bae torang keriang cepa dang. Dorang yang mau iko pemilukada pasang-pasangan te, lebe bae mulai dang beperang supaya doi habi hatu kalo. Nanti kalo ulur-ulur bebisa doi rata tana. Menangi so te guna.
Doi unto urus pemilukada di Flotim so habi banyak, jadi semua yang ada di Nagi jangan bua kepala sake me barang yang te penting. Te bae vakum alias kosong kekuasan sampe hampir satu tahun. Jejanga ada yang sengaja bua masalah tare hana tare sini biar prosesnya lama. Inga to penjabat po ada bua tingka. So ena dudo di kursi empuk po, nae oto gaul, wui…. Habis pung, putus patah le. Orang nagi bilang biar sebentar ora me so gaya, kedongga te ka.
Inga se, sekali lagi Kolong Pohong bua inga bua cecepa semua ni supaya jangan anco te guna. Lebe bae dudo sesama urus nagi tana bua be. Kalo so bae pasti ka Tuan Deo po keka lindo torang semua dari Flores daratan, Adonara me Solor. Pikir yang bae unto torang semua, jangan unto hatu dua orang nanti te bae. Kalo nagi tanah marah, inga bisa parah. Jangan sampe Lewotanah makan Korang yang punya niat te bae.
KPUD Flotim keriang bebeto dang. Pemkab me DPRD Flotim jangan bua alasan, nanti jadi antenta panjang na panjang. Inga Larantuka tu Kota Renya jangan sampe Tuan Ma me Tuan Ana marah korang yang te inga bangun nagi. Trus panwaslu awas bebae, torang mulai babak baru di torang pung kampung halaman. Kalo te puas lewat jalur hukum, kalo salah biar hukum yang ato dorang semua yang salah. Jangan sampe mulut gram mulai tecoro dari hati mulo ke mulo lain, info se….. torang so bua kerawa di Flotim. Hahahaero keretato… (******)

Tidak ada komentar:

Posting Komentar